سقط التعليم بقرار الدور الثالث وسيبقى الدور الثالث قرار ثابت اثبتَ بموجبه فشل التربية والتعليم.

مجرد سؤال
يا تري إصلاح التعليم ام إصلاح المجتمع ؟

بقلم أ / رانيا عبد المنعم

اعتقد ان تطوير التعليم لم ولن ينجح الا إذا تم القضاء على منظومة الفشل و الغش والتي تقف عائقا دون تحقيق اي مخرج من مخرجات التعليم سواء كان نظام بوكلت او تابلت او ما خلف الكواليس ..

سواء عدنا للمناهج القديمة او واكبنا العصر وادخلنا الذكاء الإصطناعي او حتى قلدنا البلدان المتقدمة ..

فبعد كارثة نتيجة الثانوية العامة .. الرأي العام من حقه يعرف :

١- يعني ايه نتيجة ثانوية عامة نكتشف ان فيها غلط بعد اسبوع كامل من ظهورها ؟!

٢- يعني ايه النتيجة تتعدل في نص الليل على موقع التنسيق بس ولما الموضوع اتكشف قررنا نتحرك و نعدل كل حاجة ؟!

٣- يعني ايه اصلا نموذج اجابة الفيزياء في اجابة غلط ؟؟

٤- طيب يعني ايه ولا حد في الكنترول اخد باله من الخطأ اثناء التصحيح ؟

٥- كل اخطاء الثانوية العامة السنة دي مين هايدفع تمنها و هايدفعه ازاي ؟!

٦ – ازاي كنا بنقول التصحيح الالكتروني يضمن عدم وجود اخطاء وهو فيه كل البلاوي دي ؟

٧- الوزارة هاتعمل ايه عشان المهزلة دي ما تتكررش تاني ؟!

٨- معلش بقى ايه يضمن لنا ان مفيش اخطاء تانية ودرجات مستخبية لطلاب ادبي ؟ وللا حتى في باقي مواد علمي ؟

٩- ثواني كدة معلش … فين الوزير ليه ما بيطلعش في بيان مصور من مكتبه يتذاع في وسائل الاعلام يقول لنا ايه اللي حصل وايه اللي بيحصل و ايه اللي هيحصل ؟

انا ممكن اكون اول متبرع للرد و هاقول إن دا فشل في المنظومة التعليمية فشل من وزير التربية و التعليم

يا ريت نركز شوية لأن دا مستقبل مش لعب
دا مجهود طالب في معاناه سنه كاملة و شدة اعصابة ليل نهار و ولي أمر طالع عينة بيحاول يوفر كل جنية علشان يعلم اولادة علشان يمكن يكونو شيء مشرف

اقولها وبكل صدق المشكلة الحقيقية هيا مشكله ضمير غائب عند المعلم الذي غشش وولي الامر الذي دفع لابنه كي يسهل له الغش والطالب الذي بنى نجاحه بالغش ..

إذن هي مشكلة اخلاق ومبادئ فاسدة وصلت لمرحلة ان يكون لها شرعية في حياتنا ..

في كل الميادين وليس التعلم ..
ولان التعلم هوا الاصل انتشر الغش في شتى نواحي الحياه ولكن باسماء مختلفة .. تارة يطلق عليه رشوة في المصالح
الحكومية او محسوبيه لاصحاب السلطة او اكراميه او بلطجة ..

فكانت النتيجة الحتمية لهذا المجتمع الفشل الذريع وانتشار الجهل والغلاء الفاحش ..

قبل اصلاح التعليم يجب ان نصلح التربية .. فهي في الاصل تربية ثم ياتي التعليم ..

استقيموا يرحمكم الله